दिगंबरा दिगंबरा श्रीपाद वल्लभ दिगंबरा च्या गजरात नृसिंहवाडी येथे गुरुपौर्णिमेनिमित्त भक्तगणांची गर्दी
दिगंबरा दिगंबरा श्रीपाद वल्लभ दिगंबरा च्या गजरात नृसिंहवाडी येथे गुरुपौर्णिमेनिमित्त भक्तगणांची गर्दी
नृसिंहवाडी : एन वाय नवा भारत डिजिटल न्यूज नेटवर्क
श्री गुरुदत्तांचे पवित्र आणि जागृत स्थान म्हणून संपूर्ण देशात ख्याती असलेल्या श्रीक्षेत्र नृसिंहवाडी येथे गुरुपौर्णिमेचा सोहळा अत्यंत चैतन्यमय आणि भक्तीमय वातावरणात पार पडला. महाराष्ट्रासह कर्नाटक, गोवा आणि आंध्र प्रदेश या शेजारील राज्यांतून आलेल्या लखो दत्तभक्तांनी पहाटेपासूनच श्रीक्षेत्र नृसिंहवाडीत हजेरी लावली होती. कृष्णा आणि पंचगंगा नदीच्या पवित्र संगमावर स्नान करण्यासाठी आणि श्री गुरुदत्तांच्या पादुकांचे दर्शन घेण्यासाठी भाविकांच्या लांबच लांब रांगा लागल्या होत्या. संपूर्ण मंदिर परिसर दिगंबरा दिगंबरा श्रीपाद वल्लभ दिगंबरा आणि श्री गुरुदेव दत्तच्या अखंड नामघोषाने दुमदुमून गेला होता.
गुरुपौर्णिमेच्या निमित्ताने नृसिंहवाडी येथील दत्त मंदिरात विविध धार्मिक आणि आध्यात्मिक कार्यक्रमांचे आयोजन करण्यात आले होते. पहाटे साडेचार वाजता काकड आरतीने दिवसाच्या धार्मिक विधींची सुरुवात झाली. यानंतर षोडशोपचार पूजा, पंचामृत अभिषेक, पादुका महापूजा, पवमान पठण, धूपदीप आरती आणि शेजारती असे पारंपरिक विधी अत्यंत भक्तिभावाने संपन्न झाले. गुरुपूजनाचा मुख्य सोहळा येथील प्रमुख पुजारी आणि मानकऱ्यांच्या उपस्थितीत पार पडला. आजपासून चातुर्मास प्रारंभ झाल्यामुळे गुरुवारपासून पारंपरिक पालखी सोहळा काही काळासाठी स्थगित करण्यात आला असून, त्याऐवजी इंदुकोटी आरती व पूजा विधी सुरू करण्यात आल्याची माहिती देवस्थान प्रशासनाकडून देण्यात आली आहे.
यंदाच्या गुरुपौर्णिमेच्या काळात कृष्णा नदीच्या पाणीपातळीत वाढ झाल्यामुळे मंदिराच्या सभा मंडपात पाणी आले होते. या पार्श्वभूमीवर भाविकांच्या सुरक्षेची पुरेशी काळजी घेत आपत्ती व्यवस्थापन आणि देवस्थान प्रशासनाने योग्य तो बंदोबस्त तैनात केला होता. वाढत्या गर्दीला नियंत्रित करण्यासाठी आणि भाविकांना सुरळीत दर्शन मिळावे यासाठी दत्त देवस्थानतर्फे उत्तर घाटापासून स्वतंत्र दर्शनरांगा, मुखदर्शन व्यवस्था, बंदिस्त सीसीटीव्ही यंत्रणा, ध्वनीक्षेपक, सुरक्षा रक्षक आणि ठिकठिकाणी सूचना फलक लावण्यात आले होते. तसेच दत्तभक्तांसाठी महाप्रसादाची सोयही करण्यात आली होती.
भाविकांच्या अलोट गर्दीमुळे नृसिंहवाडी परिसरातील सर्व वाहनतळ सकाळपासूनच पूर्णपणे भरले होते. भाविकांची गैरसोय होऊ नये म्हणून राज्य परिवहन महामंडळाच्या वतीने कुरुंदवाड आगारासह कोल्हापूर, सांगली, मिरज, कागल, इचलकरंजी आणि छ. संभाजीनगर आदी आगारांमधून जादा एसटी बसफेऱ्यांची विशेष व्यवस्था करण्यात आली होती. उत्सव शांततेत पार पाडण्यासाठी श्री दत्त देवस्थान, ग्रामपंचायत आणि शिरोळ पोलीस ठाण्याच्या वतीने मुख्य मार्गावर एकेरी वाहतूक व्यवस्था लागू करण्यात आली होती. तसेच अतिरिक्त वाहनांसाठी माहेश्वरी भवन, पाटील महाराज मठ, जगदाळे प्लॉट आणि कॉलेज परिसर येथे पर्यायी वाहनतळांची सोय करण्यात आली होती, ज्यामुळे हजारो भाविकांचा दर्शनाचा सोहळा सुरळीत पार पडला.
