ठाकरे बंधूंचा निवडणूक आयोगाविरोधात ‘गर्जना मोर्चा

ठाकरे बंधूंचा निवडणूक आयोगाविरोधात गर्जना मोर्चा’

मतदार फेरतपासणी रद्द करण्याची आणि बॅलेट पेपरवर निवडणुका घेण्याची आक्रमक मागणी

​मुंबई:एन वाय नवा भारत डिजिटल न्यूज नेटवर्क

केंद्रीय निवडणूक आयोगाच्या मतदार यादी विशेष फेरतपासणी (एसआयआर) मोहिमेतील कथित अनियमिततेविरोधात आणि निवडणूक आयोगाच्या संशयास्पद कारभारावर आक्षेप घेत मुंबईत आज ठाकरे बंधूंच्या नेतृत्वात भव्य ‘गर्जना मोर्चा’ काढण्यात आला. भायखळा ते मुंबई महानगरपालिका मुख्यालय दरम्यान निघालेल्या या मोर्चामध्ये राजकीय पक्षांचे झेंडे बाजूला ठेवून सर्व कार्यकर्त्यांनी हातात केवळ तिरंगा घेत सहभाग नोंदवला. महाविकास आघाडीतील प्रमुख नेत्यांसह विविध सामाजिक संघटनांचे प्रतिनिधीही या मोर्चात मोठ्या संख्येने उपस्थित होते. मोर्चाच्या सांगतेनंतर महापालिका मुख्यालयासमोर झालेल्या जाहीर सभेत मनसे अध्यक्ष राज ठाकरे आणि शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांनी निवडणूक आयोग व सत्ताधाऱ्यांवर जोरदार तोफ डागली.

​राज ठाकरे काय म्हणाले?

महाराष्ट्र नवनिर्माण सेनेचे अध्यक्ष राज ठाकरे यांनी आपल्या भाषणात निवडणूक आयोगाच्या कार्यपद्धतीवर अत्यंत नेमके, कायदेशीर आणि आक्रमक मुद्दे उपस्थित केले. देशात कायदा आणि संविधानाचा ढाचा मोडून काढण्याचा प्रयत्न सुरू असल्याचा आरोप करत त्यांनी प्रामुख्याने दोन ठाम मागण्या मांडल्या.

​राज ठाकरे म्हणाले की, महाराष्ट्रात सुरू असलेली संपूर्ण एसआयआर मोहीम तातडीने रद्द झाली पाहिजे. माजी केंद्रीय गृहसचिव आर. के. सिंग यांच्या अभ्यासाचा दाखला देत त्यांनी दावा केला की, एसआयआर प्रक्रिया केवळ नैसर्गिक आपत्ती, पूर, भूकंप किंवा मोठ्या प्रमाणावर स्थलांतर यांसारख्या अपवादात्मक परिस्थितीतच विशिष्ट मतदारसंघापुरती मर्यादित स्वरूपात राबवता येते. संपूर्ण राज्यभरात सरसकट अशी मोहीम राबवून लाखो मतदारांची नावे परस्पर वगळणे हे निवडणूक नियमांच्या मूळ चौकटीत बसत नाही, त्यामुळे सध्या सुरू असलेले काम पूर्णपणे बेकायदेशीर आहे.

​लोकसभा निवडणुकीनंतर अवघ्या सहा महिन्यांत झालेल्या विधानसभा निवडणुकीच्या दरम्यान महाराष्ट्रात तब्बल चाळीस ते साठ लाख मतदार अचानक कसे वाढले, असा रोकडा सवाल त्यांनी उपस्थित केला. लोकसभा निवडणुकीत सत्ताधारी पक्षाला मिळालेली मते आणि काही महिन्यांनंतर थेट वाढलेली आकडेवारी ही नैसर्गिक प्रक्रियेत बसत नाही. विधानसभा निवडणुकीच्या वेळी अचानक लाखो मतदार वाढवायचे आणि आता फेरतपासणीच्या नावाखाली राज्यातून दोन कोटी मतदारांची नावे परस्पर बाहेर काढायची, असा कारभार सुरू असल्याचा आरोप त्यांनी केला. हे वगळलेले लोक कोण आहेत आणि त्यांचा मतदानाचा अधिकार कोणाच्या सांगण्यावरून हिरावला जातोय, असा जाब त्यांनी विचारला.

​पारदर्शकतेचा आग्रह धरताना त्यांनी ईव्हीएम बंद करून मतपत्रिकांवर (बॅलेट पेपर) निवडणुका घेण्याची जुनी मागणी पुन्हा लावून धरली. जनतेच्या मनातील संशय दूर करण्यासाठी मतपत्रिकांवर मतदान घ्या, त्यानंतर जनतेने ज्या कोणाच्या पारड्यात कौल दिला असेल, तो निकाल आम्ही सर्वजण खुल्या दिलाने मान्य करू, असे सांगत त्यांनी निवडणुकीतील विश्वासार्हतेचा प्रश्न ऐरणीवर आणला. कुणाला सत्तेवर बसवायचे आणि कुणाला विरोधी पक्षात बसवायचे, याचा अंतिम निर्णय संविधानाने या देशातील जनतेला दिला आहे, निवडणूक आयोगाला किंवा प्रशासकीय यंत्रणांना नाही, याकडे त्यांनी लक्ष वेधले.

​सत्ताधाऱ्यांना सावध करताना त्यांनी नमूद केले की, आज सत्तेत असणाऱ्यांनी हे लक्षात ठेवावे की सत्ता कायमस्वरूपी नसते. जर यंत्रणांचा गैरवापर करून विरोधकांना संपवण्याचा आणि निवडणुका जिंकण्याचा पायंडा आज पाडला गेला, तर उद्या सत्तेत बदल झाल्यावर समोरचा पक्षही त्याच किंवा त्याहून दुप्पट मार्गाने वागेल, त्यामुळे लोकशाही व्यवस्थेचा पाया उद्ध्वस्त करू नका, असा गंभीर इशाराही त्यांनी दिला.

​उद्धव ठाकरे काय म्हणाले?

शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे यांनी आपल्या भाषणात हा लढा कोणत्याही एका पक्षाचा किंवा निवडणुकीपुरता मर्यादित नसून देशातील लोकशाही व स्वातंत्र्य टिकवण्याचा संघर्ष असल्याचे सांगितले.

​उद्धव ठाकरे यांनी मतदार याद्यांमधील घोळावर तीव्र संताप व्यक्त केला. महाराष्ट्रात दोन कोटी आणि संपूर्ण देशभरात मिळून तब्बल तेरा कोटी मतदारांची नावे याद्यांमधून वगळण्यात आल्याचा आरोप त्यांनी केला. तेरा कोटी म्हणजे महाराष्ट्राच्या संपूर्ण लोकसंख्येइतके नागरिक मतदानाच्या अधिकारापासून वंचित केले जात असल्याचे ते म्हणाले. मतदार वैध की अवैध हे स्थानिक पातळीवर ठरवण्याऐवजी दिल्लीतून सूत्रे हलवली जात असून निवडणूक आयोगाच्या स्वायत्ततेवर त्यांनी कठोर प्रश्नचिन्ह उपस्थित केले. मुख्य निवडणूक आयुक्तांच्या निर्णयांवर आणि त्यांना मिळणाऱ्या संरक्षणावर ताशेरे ओढत त्यांनी सत्तेच्या जोरावर यंत्रणांचा गैरवापर सहन केला जाणार नाही, असा इशारा दिला.

​देशात विकासाच्या नावाखाली हुकूमशाही प्रवृत्ती डोके वर काढत असेल, तर ती हाणून पाडण्यासाठी सर्वसामान्य नागरिक रस्त्यावर उतरल्याशिवाय राहणार नाहीत, असे सांगत त्यांनी राज्यातील बिघडलेल्या कायदा-सुव्यवस्थेच्या मुद्यावरून गृहखात्यावरही निशाणा साधला.

​निवडणूक प्रक्रियेतील त्रुटींवरून सुरू झालेला हा वाद आता केवळ मुंबईपुरता मर्यादित न राहता राज्यभरात तापण्याची चिन्हे दिसत असून, ठाकरे बंधूंच्या एकत्र येण्यामुळे विरोधकांच्या आंदोलनाला मोठी धार आल्याचे आजच्या मोर्चावरून स्पष्ट झाले आहे.