बीबीसी’विरोधातील अब्रूनुकसानीचा दावा : डोनाल्ड ट्रम्प यांना ११ डिसेंबरपूर्वी शपथेवर साक्ष नोंदवण्याचे अमेरिकन न्यायालयाचे आदेश
आंतरराष्ट्रीय : एन वाय नवा भारत डिजिटल न्यूज नेटवर्क
बीबीसी’विरोधातील अब्रूनुकसानीचा दावा : डोनाल्ड ट्रम्प यांना ११ डिसेंबरपूर्वी शपथेवर साक्ष नोंदवण्याचे अमेरिकन न्यायालयाचे आदेश
मियामी / वॉशिंग्टन : वृत्तसेवा
ब्रिटिश ब्रॉडकास्टिंग कॉर्पोरेशन अर्थात ‘बीबीसी’विरुद्ध दाखल केलेल्या तब्बल १० अब्ज डॉलर्सच्या अब्रूनुकसानीच्या दाव्यात अमेरिकेचे राष्ट्राध्यक्ष डोनाल्ड ट्रम्प यांना न्यायालयाचा दणका बसला आहे. या खटल्यासंदर्भात ट्रम्प यांनी येत्या ११ डिसेंबरपर्यंत स्वतः उपस्थित राहून शपथेवर साक्ष नोंदवावी, असा सक्त आदेश फ्लोरिडा येथील फेडरल न्यायालयाच्या दंडाधिकारी न्यायाधीश अँजेलिक लेट यांनी दिला आहे. ठरलेल्या मुदतीत त्यांनी साक्ष न नोंदवल्यास त्यांच्यावर दंडात्मक कारवाई केली जाईल, तसेच त्यांनी दाखल केलेला खटला थेट फेटाळला जाण्याचा इशाराही न्यायालयाने दिला आहे.
अमेरिकेतील संसदेवर म्हणजेच कॅपिटल हिलवर ६ जानेवारी २०२१ रोजी झालेल्या हिंसाचारापूर्वी ट्रम्प यांनी समर्थकांसमोर भाषण केले होते. या भाषणातील दोन वेगवेगळे भाग चुकीच्या पद्धतीने जोडून ‘पॅनोरामा’ या माहितीपटात दाखवण्यात आल्याचा ट्रम्प यांचा आक्षेप आहे. या माहितीपटामुळे आपण थेट हिंसाचाराचे आवाहन केल्याचा चुकीचा संदेश जगभरात गेला आणि आपली प्रचंड बदनामी झाली, असा आरोप करत त्यांनी न्यायालयात दाद मागितली आहे.
अमेरिकन न्यायव्यवस्थेतील ‘डिस्कव्हरी’ प्रक्रियेअंतर्गत दोन्ही बाजूंच्या पुराव्यांची देवाणघेवाण सुरू असून, या नियमांनुसार ट्रम्प यांची १६ ऑक्टोबर रोजी उलटतपासणी स्वरूपातील साक्ष नोंदवली जाणार होती. मात्र, ऐनवेळी ‘राष्ट्रीय महत्त्वाची कामे’ असल्याचे कारण पुढे करत ट्रम्प यांच्या वकिलांनी ही साक्ष रद्द केली. प्रत्यक्षात त्याच दिवशी ट्रम्प यांनी जॉर्जिया येथे राजकीय प्रचारसभेत सहभाग घेतला होता आणि त्यानंतर मार-ए-लागो येथील निधी संकलन कार्यक्रमाला उपस्थिती दर्शवली होती. बीबीसीचे वकील चार्ल्स टॉबिन यांनी न्यायालयाच्या निदर्शनास ही बाब आणून दिली आणि ट्रम्प हेतुपुरस्सर साक्ष देण्यास टाळाटाळ करत असल्याचा युक्तिवाद केला. पुरावे नोंदवण्याची मुदत अवघ्या दोन महिन्यांवर आली असतानाही ट्रम्प यांच्याकडून होत असलेल्या विलंबावर बीबीसीच्या वकिलांनी तीव्र आक्षेप घेतला.
ट्रम्प यांच्या वकिलांनी हा आरोप फेटाळत राष्ट्राध्यक्ष चौकशी टाळत नसून, पुढील वर्षी जानेवारीच्या मध्यावर ते साक्षीसाठी हजर राहू शकतील, असा दावा केला होता. मात्र, न्यायालयाने हा युक्तिवाद अमान्य करत १८ डिसेंबर रोजी पुराव्यांची मुदत संपण्यापूर्वी, म्हणजेच ११ डिसेंबरपर्यंत साक्ष नोंदवणे अनिवार्य केले. ही साक्ष वकिलांच्या उपस्थितीत व्हिडिओ रेकॉर्डिंगद्वारे घेतली जाणार असून, न्यायालयीन नियमांनुसार ते रेकॉर्डिंग केवळ खटल्यापुरतेच मर्यादित राहील.
दरम्यान, भाषणाचे संकलन करताना झालेल्या चुकीबद्दल बीबीसीने दिलगिरी व्यक्त केली असली, तरी संबंधित माहितीपट अमेरिकेच्या भूमीवर कोणत्याही वाहिनीवर किंवा संकेतस्थळावर अधिकृतरीत्या प्रसारितच झाला नव्हता, असा दावा करत प्रसारमाध्यमाने हा खटला रद्द करण्याची मागणी केली आहे. अमेरिकेत हा माहितीपट दाखवल्याचा कोणताही सबळ पुरावा सादर करता न आल्यामुळे ट्रम्प यांच्या वकिलांना बीबीसीच्या व्यावसायिक शाखेविरोधातील (बीबीसी स्टुडिओज) दावा मागे घ्यावा लागला होता. आता न्यायालयाच्या ताज्या आदेशामुळे ट्रम्प यांना स्वतः हजर राहून बीबीसीच्या वकिलांच्या प्रश्नांचा सामना करावा लागणार आहे.
