केंद्रीय मंत्री हरदीप सिंह पुरी यांच्या एपस्टीन फाईल बाहेर ; फोटोंवरून राजकीय भूकंप; विरोधक आक्रमक थेट चौकशीची मागणी

केंद्रीय मंत्री हरदीप सिंह पुरी यांच्या एपस्टीन फाईल बाहेर ; फोटोंवरून राजकीय भूकंप; विरोधक आक्रमक थेट चौकशीची मागणी

नवी दिल्ली : एन वाय नवा भारत डिजिटल न्यूज नेटवर्क

अमेरिकेच्या न्याय विभागाने नुकत्याच सार्वजनिक केलेल्या ‘एपस्टीन फाईल्स’मधील कथित छायाचित्रांमुळे भारतीय राजकारणात एकच खळबळबळ उडाली आहे. केंद्रीय पेट्रोलियम आणि नैसर्गिक वायू मंत्री हरदीप सिंह पुरी हे कुख्यात अब्जाधीश जेफ्री एपस्टीनसोबत एका खोलीत अत्यंत गोपनीय चर्चा करत असल्याचा दावा काही फोटोंच्या आधारे केला जात असून, यामुळे देशातील राजकीय वातावरण कमालीचे तापले आहे. या कथित छायाचित्रांची दखल घेत विरोधी पक्षांनी केंद्र सरकार आणि हरदीप सिंह पुरी यांच्यावर अत्यंत गंभीर आरोप केले आहेत.

सोशल मीडियावर आणि विविध आंतरराष्ट्रीय व्यासपीठांवर वेगाने व्हायरल होत असलेल्या या छायाचित्रांमध्ये हरदीप सिंह पुरी हे जेफ्री एपस्टीनसोबत समोरासमोर बसून चर्चा करताना दिसत आहेत. एका टेबलभोवती विशिष्ट प्रकारच्या खुर्च्यांवर ही बैठक सुरू असल्याचे आणि त्यांच्यासमोर काही महत्त्वाची कागदपत्रे असल्याचे या चित्रांमध्ये स्पष्ट होत आहे. या फोटोच्या चौकटीत या दोघांशिवाय तिसरी कोणतीही व्यक्ती उपस्थित नसल्याने, ही केवळ अधिकृत बैठक नसून एक गुप्त वैयक्तिक चर्चा होती, असा संशय विरोधकांनी व्यक्त केला आहे.

या संपूर्ण प्रकरणावर काँग्रेसचे प्रवक्ते अनिश गवांडे आणि शिवसेना नेते संजय राऊत यांच्यासह अनेक ज्येष्ठ विरोधी नेत्यांनी केंद्रीय मंत्र्यांच्या जुन्या विधानांचा दाखला देत त्यांच्यावर खोटारडेपणाचा आरोप केला आहे. हरदीप सिंह पुरी यांनी यापूर्वी आपण एपस्टीनला कधीही वैयक्तिक पातळीवर भेटलो नसल्याचे म्हटले होते. आंतरराष्ट्रीय शांतता संस्थेच्या म्हणजेच ‘आयपीआय’च्या शिष्टमंडळाचा एक भाग म्हणून आपण केवळ तीन ते चार वेळा त्यांच्या कार्यक्रमात उपस्थित राहिल्याचा दावा त्यांनी केला होता. मात्र, आता समोर आलेल्या चित्रांमध्ये संपूर्ण शिष्टमंडळ गायब असून केवळ दोघेच एकांतात बसलेले दिसत असल्याने, पुरी यांनी देशाची दिशाभूल केल्याचा आरोप विरोधकांनी केला आहे. विरोधकांनी या प्रकरणी थेट केंद्र सरकारला धारेवर धरले असून, या कथित बैठकीत नेमकी काय चर्चा झाली, याची उच्चस्तरीय आणि सखोल चौकशी करण्याची मागणी केली आहे.

काँग्रेस प्रवक्ते अनिश गवांडे यांनी यावर थेट टीका करताना म्हटले आहे की, केंद्रीय मंत्र्यांनी यापूर्वी संसदेत आणि जाहीरपणे सांगितले होते की ते कधीही एपस्टीनला वैयक्तिकरित्या भेटले नाहीत. परंतु आता समोर आलेली छायाचित्रे काही वेगळीच कथा सांगत आहेत. एका खोलीत दोनच व्यक्ती बसून गंभीर चर्चा करत आहेत आणि तिथे इतर कोणतेही शिष्टमंडळ दिसत नाही. हा विरोधाभास संशयास्पद असून सरकारने यावर अधिकृत भूमिका स्पष्ट करावी. दुसरीकडे, शिवसेना नेते संजय राऊत यांनीही या मुद्द्यावरून सरकारला धारेवर धरले असून, नैतिकतेच्या गप्पा मारणारे सरकार आता आपल्या मंत्र्यांच्या या गुप्त बैठकीवर मौन का बाळगून आहे, असा सवाल केला आहे.

दरम्यान, सत्ताधारी भारतीय जनता पक्षाच्या (भाजप) वरिष्ठ नेत्यांनी आणि प्रवक्त्यांनी विरोधकांचे हे सर्व आरोप पूर्णपणे फेटाळून लावले आहेत. भाजपच्या वतीने सांगण्यात आले आहे की, निवडणुकांच्या तोंडावर विरोधकांकडे कोणताही ठोस मुद्दा उरलेला नसल्याने ते अशा जुन्या आणि संदर्भाशिवाय असलेल्या फोटोंचा आधार घेऊन जाणीवपूर्वक चिखलफेक करत आहेत. हरदीप सिंह पुरी हे देशाचे एक अत्यंत प्रतिथयश राजनैतिक अधिकारी (डिप्लोमॅट) राहिले असून आंतरराष्ट्रीय स्तरावर भारताचे प्रतिनिधित्व करताना त्यांना शेकडो बैठकांमध्ये सहभागी व्हावे लागले आहे. एखाद्या आंतरराष्ट्रीय संस्थेच्या अधिकृत शिष्टमंडळाच्या भेटीदरम्यान घेतलेल्या फोटोचा गैरवापर करून केंद्रीय मंत्र्यांची प्रतिमा मलिन करण्याचा कट रचला जात असल्याचा पलटवार भाजपने केला आहे.

या वाढत्या राजकीय वादावर स्वतः केंद्रीय मंत्री हरदीप सिंह पुरी यांनी आणि त्यांच्या कार्यालयाने आपली बाजू अत्यंत स्पष्टपणे मांडली आहे. ही छायाचित्रे २०१४ ते २०१७ या कालावधीतील असून, जेव्हा पुरी हे न्यूयॉर्कमधील इंटरनॅशनल पीस इन्स्टिट्यूटमध्ये (IPI) कार्यरत होते, तेव्हाची ही घटना असल्याचे सांगण्यात आले आहे. या संस्थेचे तत्कालीन प्रमुख टेर्जे रोड-लार्सन यांच्या निमंत्रणावरून आणि त्यांच्या अधिकृत कार्यक्रमांचा भाग म्हणूनच या भेटी झाल्या होत्या. आपण कधीही एपस्टीनसोबत एका खोलीत नव्हतो असा दावा आपण कधीच केला नव्हता, परंतु ही भेट कोणत्याही वैयक्तिक कारणासाठी नसून केवळ अधिकृत शिष्टमंडळाच्या बैठकीचा एक भाग होती, असे स्पष्टीकरण पुरी यांच्या बाजूने देण्यात आले आहे. बऱ्याच वर्षांपूर्वीची ही घटना असल्याने त्या विशिष्ट खोलीत इतर कोण उपस्थित होते किंवा ही नेमकी कोणत्या तारखेची बैठक होती, याची संपूर्ण माहिती आता देणे शक्य नसल्याचेही त्यांच्या कार्यालयाने म्हटले आहे.

विशेष म्हणजे, अमेरिकेच्या न्याय विभागाने प्रसिद्ध केलेल्या दस्तऐवाजांमध्ये किंवा यापूर्वी झालेल्या कोणत्याही आंतरराष्ट्रीय तपासात हरदीप सिंह पुरी यांच्यावर जेफ्री एपस्टीनच्या कोणत्याही बेकायदेशीर कृत्यांमध्ये किंवा मानवी तस्करीच्या जाळ्यात सामील असल्याचा कोणताही आरोप ठेवण्यात आलेला नाही. अमेरिकन तपास यंत्रणांच्या कोणत्याही अहवालात त्यांच्या नावावर कोणताही गुन्हेगारी ठपका ठेवण्यात आलेला नाही, ही बाब या वादात महत्त्वाची मानली जात आहे. मात्र, आगामी निवडणुकांच्या पार्श्वभूमीवर विरोधकांनी हा मुद्दा अत्यंत आक्रमकपणे लावून धरल्याने येत्या हिवाळी अधिवेशनातही याचे तीव्र पडसाद उमटण्याची शक्यता राजकीय वर्तुळात वर्तवली जात आहे.