महेश जाधव यांचा मास्टरस्ट्रोक; चेन्नईला चाललेला ५०० कोटींचा प्रकल्प सांगलीत परत!
महेश जाधव यांचा मास्टरस्ट्रोक; चेन्नईला चाललेला ५०० कोटींचा प्रकल्प सांगलीत परत !
सांगली : (अमोल सुतार) एन वाय नवा भारत डिजिटल न्यूज नेटवर्क
दक्षिण कोरियातील अग्रगण्य बहुराष्ट्रीय कंपनी ‘ह्योसंग’ने सांगली जिल्ह्यातील शाळगाव औद्योगिक वसाहतीत (एमआयडीसी) तब्बल पाचशे कोटी रुपयांचा भव्य प्रकल्प उभारण्याचा अंतिम निर्णय घेतला आहे. प्रशासकीय अडथळे आणि भूखंड वाटपातील विलंबामुळे हा प्रकल्प तामिळनाडूतील चेन्नईकडे वळवण्यात आला होता. मात्र, सावंतपूरचे भूमिपुत्र आणि आंतरराष्ट्रीय उद्योगवर्तुळात कार्यरत असलेले महेश श्रीकांत जाधव यांच्या अथक प्रयत्नांमुळे आणि मुत्सद्देगिरीमुळे हा प्रकल्प पुन्हा एकदा सांगलीत आणण्यात यश आले आहे. या निर्णयामुळे जिल्ह्याच्या औद्योगिक विकासाला मोठी गती मिळणार असून स्थानिक तरुणांसाठी रोजगाराचे नवे दालन उघडणार आहे.
देशभरात सध्या परदेशी गुंतवणुकीसाठी विविध राज्यांमध्ये तीव्र स्पर्धा सुरू आहे. ह्योसंग कंपनीला आपल्या राज्यात आकर्षित करण्यासाठी गुजरात, तामिळनाडू यांसारख्या औद्योगिकदृष्ट्या प्रगत राज्यांनी कोट्यवधींच्या सवलती आणि आकर्षक पॅकेज देऊ केले होते. सुरुवातीला पलूस औद्योगिक क्षेत्रात या प्रकल्पाची पायाभरणी करण्याचे ठरले होते. परंतु, अंतर्गत निर्णय प्रक्रियेतील विलंबामुळे प्रस्तावित भूखंड दुसऱ्या एका उद्योगाला वाटप करण्यात आला. ऐनवेळी निर्माण झालेल्या या पेचप्रसंगामुळे कंपनीने सांगलीतून काढता पाय घेत थेट चेन्नईचा मार्ग धरला होता. हक्काचा प्रकल्प जिल्ह्याबाहेर गेल्याचे स्पष्ट झाल्यानंतरही महेश जाधव यांनी माघार न घेता ह्योसंगच्या उच्चपदस्थ व्यवस्थापनाशी सातत्याने संवाद सुरू ठेवला.
जाधव यांनी गेल्या दशकभरात सांगली परिसरातील औद्योगिक क्षमतेची ओळख आंतरराष्ट्रीय पातळीवर करून देण्यासाठी सातत्यपूर्ण पाठपुरावा केला आहे. ह्योसंगच्या कोरियन शिष्टमंडळाला त्यांनी देशभरातील विविध औद्योगिक पट्ट्यांमध्ये स्वतः सोबत नेऊन महाराष्ट्रातील, विशेषतः सांगलीतील भौगोलिक सुरक्षितता, मुबलक पाणी, दर्जेदार वीजपुरवठा आणि कुशल मनुष्यबळाची उपलब्धता पटवून दिली. अनेक बैठका, चर्चासत्रे आणि तांत्रिक अडचणींवर स्थानिक पातळीवर तोडगा काढत त्यांनी परदेशी गुंतवणूकदारांच्या मनातील सर्व शंकांचे निरसन केले. अखेर गुजरात आणि तामिळनाडूच्या प्रस्तावांना बाजूला सारत कंपनीने शाळगाव एमआयडीसीची अंतिम निवड केली.
गेल्या वीस वर्षांच्या कारकिर्दीत महेश जाधव यांनी पलूस आणि आसपासच्या ग्रामीण भागात अनेक आंतरराष्ट्रीय उद्योगांना आणण्यात मोलाची भूमिका बजावली आहे. जागतिक कीर्तीच्या ‘सुल्झर’ पंप्ससह विविध कोरियन कंपन्यांना या भागात यशस्वीरीत्या स्थापित करण्यात त्यांचे मोठे योगदान राहिले आहे. यापूर्वी स्थापन झालेल्या उद्योगांमुळे शेकडो स्थानिक अभियंते, पदविकाधारक, तंत्रज्ञ आणि कामगारांना दर्जेदार रोजगाराच्या संधी मिळाल्या आहेत. ग्रामीण भागातील तरुणांना स्थानिक पातळीवरच जागतिक मानकांचे तांत्रिक प्रशिक्षण मिळवून देण्याचा त्यांचा ध्यास राहिला आहे.
शाळगाव एमआयडीसीमध्ये ह्योसंगच्या आगमनामुळे केवळ एका कारखान्याची उभारणी होणार नसून, त्याभोवती पूरक सुटे भाग बनवणारे छोटे-मोठे कारखाने, वाहतूक आणि सेवा क्षेत्रालाही मोठा फायदा होणार आहे. राज्याबाहेर चाललेला पाचशे कोटींचा मोठा प्रकल्प केवळ एका स्थानिक सुपुत्राच्या जिद्दीमुळे आणि अभ्यासपूर्ण पाठपुराव्यामुळे पुन्हा जिल्ह्यात दाखल झाल्याने उद्योग क्षेत्रातून महेश जाधव यांच्या दूरदृष्टीचे कौतुक होत आहे.
