बोएलो’ चक्रीवादळाचा ब्रिटनला भीषण तडाखा ; ५७ हजारांहून अधिक घरे अंधारात, विमाने व रेल्वे सेवा ठप्प, लंडनचा ‘दिवाळी ऑन द स्क्वेअर’ सोहळा रद्द
आंतरराष्ट्रीय : एन वाय नवा भारत डिजिटल न्यूज नेटवर्क
बोएलो’ चक्रीवादळाचा ब्रिटनला भीषण तडाखा ; ५७ हजारांहून अधिक घरे अंधारात, विमाने व रेल्वे सेवा ठप्प, लंडनचा ‘दिवाळी ऑन द स्क्वेअर’ सोहळा रद्द
लंडन : वृत्तसेवा
ब्रिटनमध्ये सलग दुसऱ्या वादळाने हाहाकार माजवला असून काही दिवसांपूर्वी आलेल्या ‘ऑस्टेन’ चक्रीवादळानंतर आता ‘बोएलो’ चक्रीवादळाने उत्तरेकडील भागाला जोरदार तडाखा दिला आहे. ताशी १३० ते १३७ किलोमीटरच्या विनाशकारी वेगाने वाहणारे वारे, मुसळधार पाऊस आणि बर्फवृष्टीमुळे ब्रिटनमधील जनजीवन पूर्णपणे विस्कळित झाले आहे. वादळाचा तडाखा ग्रेटर मँचेस्टर, लँकेशायर आणि कम्ब्रिया या भागांना सर्वाधिक बसला असून ५७ हजारांहून अधिक घरांचा वीजपुरवठा खंडित झाला आहे. अनेक शहरांमध्ये पुराचा धोका निर्माण झाल्याने हवामान खात्याने सतर्कतेचा इशारा दिला आहे.
ब्रिटनच्या हवामान विभागाने स्कॉटलंड, उत्तर आयर्लंड आणि उत्तर इंग्लंडच्या दुर्गम भागांसाठी तीव्र ‘अँबर अलर्ट’ जारी केला आहे. वादळामुळे वीजयंत्रणेची प्रचंड हानी झाली असून अनेक ठिकाणी विजेचे खांब उन्मळून तारा रस्त्यांवर कोसळल्या आहेत. स्कॉटिश अँड सदर्न इलेक्ट्रिसिटी नेटवर्क्स, नॉर्दर्न पॉवरग्रीड तसेच स्थानिक वितरण कंपन्यांच्या कार्यक्षेत्रात हजारो कुटुंबे अंधारात आहेत. सोसाट्याच्या वाऱ्यांमुळे वीजपुरवठा पूर्ववत करण्याच्या कामात कर्मचाऱ्यांना मोठ्या अडचणींचा सामना करावा लागत आहे. प्रशासनाने नागरिकांना कोणत्याही तुटलेल्या किंवा लोंबकळणाऱ्या वीज तारांजवळ न जाण्याचा आणि तात्काळ आपत्कालीन क्रमांकावर माहिती देण्याचा कडक इशारा दिला आहे.
वादळाचा सर्वात मोठा फटका वाहतूक आणि दळणवळण व्यवस्थेला बसला आहे. जोरदार वाऱ्यांमुळे ब्रिटनमधील प्रमुख विमानतळांवरून ५० हून अधिक विमानांची उड्डाणे रद्द करण्यात आली आहेत, तर अनेक विमाने इतरत्र वळवण्यात आली आहेत. रेल्वे रुळांवर मोठमोठी झाडे कोसळल्याने स्कॉटलंड आणि उत्तर इंग्लंडमधील रेल्वे वाहतूक ठप्प झाली आहे. प्रेस्टन आणि एडिनबर्गच्या उत्तरेकडील रेल्वे फेऱ्या रद्द करून प्रवाशांना अत्यावश्यक कामाव्यतिरिक्त प्रवास टाळण्याचे आवाहन करण्यात आले आहे. तसेच समुद्र खवळलेला असल्याने बहुतांश सागरी फेरी सेवा स्थगित करण्यात आल्या आहेत. रस्ते वाहतुकीवरही गंभीर परिणाम झाला असून पेनाईन्स पर्वतरांगेतून जाणारा सुमारे २४ किलोमीटर लांबीचा प्रमुख ‘ए६६’ महामार्ग सुरक्षेचा उपाय म्हणून दोन्ही बाजूंनी बंद करण्यात आला आहे.
सुरक्षेचा उपाय म्हणून लंडनमधील ट्रॅफल्गर स्क्वेअर येथे दरवर्षी मोठ्या उत्साहात होणारा प्रसिद्ध ‘दिवाळी ऑन द स्क्वेअर’ हा भव्य सांस्कृतिक कार्यक्रम प्रशासनाला रद्द करावा लागला आहे. याशिवाय स्कॉटलंडमधील ऐतिहासिक एडिनबर्ग कॅसलसह अनेक पर्यटन स्थळे आणि सार्वजनिक उद्याने तात्पुरती बंद ठेवण्यात आली आहेत. उत्तर भागातील अनेक नद्यांची पातळी वाढल्याने पूरस्थितीचा धोका निर्माण झाला असून केअरनगॉर्म्स पर्वतरांगांमध्ये मोसमातील पहिली जोरदार बर्फवृष्टी झाली आहे. हे संकट अजून काही दिवस कायम राहण्याची शक्यता असल्याने नागरिकांनी हवामानाच्या ताज्या अंदाजावर लक्ष ठेवून सुरक्षित ठिकाणीच राहावे, असे आवाहन स्थानिक प्रशासनाने केले आहे.
