ग्राहकांनी फिरवली पेट्रोलकडे पाठ ? ऑगस्टमध्ये सीएनजी आणि इलेक्ट्रिक गाड्यांनी पेट्रोलला पछाडत रचला नवा इतिहास..

ग्राहकांनी फिरवली पेट्रोलकडे पाठ ? ऑगस्टमध्ये सीएनजी आणि इलेक्ट्रिक गाड्यांनी पेट्रोलला पछाडत रचला नवा इतिहास…..

सणांपूर्वीच वाहन बाजारात खरेदीचा महापूर ऑगस्टमध्ये २४ लाखांवर वाहनांची विक्री

एन वाय नवा भारत डिजिटल न्यूज नेटवर्क : ऑटो स्पेशल

​नवी दिल्ली : एकीकडे ई-२० पेट्रोलबाबत बाजारात विविध दावे-प्रतिदावे सुरू असताना, पेट्रोलमध्ये इथेनॉलच्या प्रमाणावरून रंगलेल्या चर्चांचा थेट परिणाम आता वाहन खरेदीदारांच्या मानसिकतेवर स्पष्टपणे उमटताना दिसत आहे. नुकत्याच हाती आलेल्या अधिकृत आकडेवारीनुसार, सणासुदीपूर्वीच देशभरात ग्राहकांनी मोठ्या प्रमाणावर वाहनांची खरेदी केली असून, यावेळी मात्र पेट्रोलऐवजी सीएनजी, इलेक्ट्रिक आणि हायब्रिड अशा पर्यायी इंधनावरील वाहनांना ग्राहकांनी सर्वाधिक पसंती दिल्याचे समोर आले आहे. पेट्रोलचे सातत्याने चढे राहणारे दर, ई-२० मुळे वाहनांच्या देखभालीवर भविष्यात होणाऱ्या संभाव्य खर्चाची धास्ती आणि इंधन कार्यक्षमतेचे गणित या सर्वांमुळे ग्राहक नकळत पारंपरिक पेट्रोलपासून दूर जात पर्यायी इंधनाकडे मोठ्या प्रमाणावर वळले आहेत. बाजारातील एक मोठा हिस्सा यावेळी सीएनजी, हायब्रिड आणि इलेक्ट्रिक वाहनांनी काबीज केला असून, येणाऱ्या काळात भारतीय वाहन बाजारातील ग्राहकांच्या बदलत्या मानसिकतेचा हा स्पष्ट संकेत मानला जात आहे.

​फेडरेशन ऑफ ऑटोमोबाईल डीलर्स असोसिएशनने (फाडा) जाहीर केलेल्या ताज्या अहवालानुसार, देशांतर्गत वाहन उद्योगात सरलेल्या ऑगस्ट महिन्यात विक्रीचे जुने सर्व विक्रम मोडीत निघाले आहेत. समाधानकारक मान्सून आणि सणांची चाहूल यामुळे देशभरातील शोरूम्समधून तब्बल २४ लाख २३ हजार २०१ वाहने विकली गेली. भारतीय वाहन उद्योगाच्या इतिहासातील ही ऑगस्ट महिन्यातील सर्वोच्च विक्री ठरली आहे. गेल्या वर्षी याच ऑगस्ट महिन्यात २० लाख ६२ हजार ३८ वाहनांची नोंदणी झाली होती; म्हणजेच यंदा वाहन विक्रीत तब्बल १७.५१ टक्क्यांची मजबूत वाढ नोंदवली गेली आहे.

​या वेळच्या वाहन बाजारातील सर्वांत ऐतिहासिक घडामोड म्हणजे प्रवासी कार बाजारात सीएनजी, हायब्रिड आणि बॅटरीवर चालणाऱ्या इलेक्ट्रिक वाहनांचा एकत्रित वाटा वाढून थेट ४१.९५ टक्क्यांवर पोहोचला आहे. त्या तुलनेत पेट्रोल कारचा वाटा घसरून ४०.८५ टक्क्यांवर आला आहे. भारतीय वाहन बाजाराच्या इतिहासात पर्यायी इंधनाने पारंपरिक पेट्रोल गाड्यांना मागे टाकण्याची ही पहिलीच वेळ ठरली आहे. यामध्ये सीएनजीचा वाटा २५.२८ टक्के, हायब्रिडचा ९.०४ टक्के आणि इलेक्ट्रिक वाहनांचा वाटा ७.६३ टक्के नोंदवला गेला, तर डिझेल आणि इतर इंधनांचा वाटा १७.२० टक्क्यांवर स्थिरावला आहे.

​ग्राहकांच्या पसंतीचा विचार केला, तर प्रवासी कार श्रेणीत टाटा मोटर्सच्या ‘टाटा पंच’ या कॉम्पॅक्ट एसयूव्हीने देशात पहिला क्रमांक पटकावला आहे. ऑगस्ट महिन्यात एकट्या पंचच्या २१,३२० गाड्यांची विक्री झाली. मारुती सुझुकीची वॅगन-आर २०,१८० गाड्यांच्या विक्रीसह दुसऱ्या, तर मारुती स्विफ्ट १९,८३२ गाड्यांसह तिसऱ्या स्थानी राहिली. यानंतर मारुती फ्रॉन्क्स (१८,७३०), अर्टिगा (१८,५१६), टाटा नेक्सॉन (१८,४३१), मारुती डिझायर (१८,४१८), ह्युंदाई क्रेटा (१६,२८८), मारुती बलेनो (१५,७४६) आणि महिंद्रा स्कॉर्पिओ (१५,५७६) या गाड्या देशातील टॉप-१० सर्वाधिक खपणाऱ्या गाड्या ठरल्या आहेत. पहिल्या दहापैकी सहा मॉडेल्स एकट्या मारुती सुझुकीचे असल्याने कंपनीने आपले वर्चस्व पुन्हा सिद्ध केले आहे.

​कंपन्यांच्या एकूण कामगिरीचा आढावा घेतल्यास, मारुती सुझुकीने १ लाख ६५ हजार २०० कार विकून ४१.०५ टक्के बाजारहिश्श्यासह आपले निर्विवाद अव्वल स्थान कायम राखले आहे. टाटा मोटर्स ५७,८४१ कार विकून दुसऱ्या स्थानी, तर महिंद्रा ५०,२४५ वाहनांसह तिसऱ्या आणि ह्युंदाई ४६,९८७ गाड्यांसह चौथ्या क्रमांकावर राहिली आहे.

​दुचाकींच्या बाजारातही मोठी तेजी पाहायला मिळाली असून, ग्रामीण भागातील आर्थिक सुधारणेमुळे १७ लाख १४ हजार ६१० दुचाकींची विक्री झाली. ही विक्री गेल्या वर्षीच्या तुलनेत १९.६९ टक्क्यांनी अधिक आहे. एकूण प्रवासी कार विक्रीने पहिल्यांदाच चार लाखांचा टप्पा ओलांडून ४ लाख २ हजार ३९८ वर झेप घेतली आहे, तर मालवाहतूक आणि व्यावसायिक वाहनांची विक्री ९०,७६९ वर पोहोचली आहे.

​फाडाचे अध्यक्ष साई गिरिधर यांच्या मते, ऑगस्ट महिना विक्रीच्या दृष्टीने अभूतपूर्व ठरला आहे. आगामी गणेशोत्सव, नवरात्र आणि दिवाळीच्या काळात विक्रीचा हा वेग आणखी वाढण्याची शक्यता आहे. पर्यायी इंधनाला मिळणारा वाढता पाठिंबा हा देशातील हरित प्रवासाला गती देणारा ठरत असल्याचे त्यांनी स्पष्ट केले.